Банките предвремено ќе ја исплатат и мајската пензија
Корисниците на дебитни картички со својата пензија ќе располагаат веќе од среда, 27 мај 2020 година
Македонската банкарска асоцијација ја известува јавноста дека банките се подготвени предвремено да ја извршат исплатата на мајските пензии.
Сите пензионери коишто поседуваат дебитни картички, веќе во среда, 27 мај 2020 година, преку банкоматите и во трговската мрежа ќе располагаат со својата мајска пензија.
Готовинската исплата на пензиите, за оние пензионери коишто не поседуваат дебитни картички, како што е соопштено и овојпат ќе се спроведе во групи, според следниот распоред:
- во среда, 27 мај – пензии во висина до 11.000 денари;
- во четврток, 28 мај – пензии во висина од 11.001 денари до 14.000 денари;
- во петок, 29 мај – пензии во висина од 14.001 денари до 18.000 денари;
- во понеделник, 01 јуни – пензии во висина над 18.000 денари.
Ги молиме клиентите коишто не поседуваат дебитна картичка да се придржуваат до овој распоред со цел успешно спроведување на исплатата и намалување на гужвите.
Апелираме сите корисници на пензии кои досега не го сториле тоа, при посета на филијалите и експозитурите заради подигнување готовина од мајската пензија, да пополнат барање за изработка на дебитна картичка. Со тоа, при исплатата на следната пензија, физичкото присуство во експозитурите и филијалите ќе биде помало, а секој пензионер ќе има лесен, брз и едноставен пристап до своите средства во секое време.
Сите банки преземаат активности за при готовинската исплата на пензиите да бидат запазени сите препораки за заштита на здравјето. Потсетуваме дека корисниците на банкарски услуги при посета на филијалите и експозитурите треба да носат лична заштитна опрема и да одржуваат соодветна дистанца согласна со насоките.
