Свечено одбележување на успехот на најдобрите тимови од Европскиот квиз на пари 2026
Во просториите на Македонската банкарска асоцијација денес, 09.06.2026 година, се одржа свечен настан посветен на најуспешните тимови од националниот натпревар за Европскиот квиз на пари 2026. Финалето на овој престижен европски натпревар за финансиска писменост се одржа на 19 мај 2026 година во Брисел, Белгија, во организација на Европската банкарска федерација.
На настанот присуствуваа претставници на Македонската банкарска асоцијација, Народната банка и Комисијата за хартии од вредност, како и членовите на трите најдобри тимови од националниот натпревар и нивниот ментор.
На свеченоста им беа доделени признанија и пригодни подароци на учениците и менторот, како признание за постигнатите резултати и покажаното знаење во областа на финансиската писменост. Наградени беа:
- Теодор Јованов и Софија Гудумановски од СЕПУГС „Васил Антевски-Дрен“ – Скопје, за освоено трето место;
- Ива Велковска и Лана Стојевска од СЕПУГС „Васил Антевски-Дрен“ – Скопје, за освоено второ место; и
- Дарија Боризовска и Сара Милковска од СЕПУГС „Васил Антевски-Дрен“ – Скопје, за освоено прво место и претставување на нашата земја на европското финале во Брисел – сите тимови водени под менторство на професорката Билјана Ниновска.
Македонската банкарска асоцијација, во соработка со Народната банка и Комисијата за хартии од вредност и понатаму останува посветена на унапредувањето на финансиската писменост кај младите како важен предуслов за нивно активно, информирано и одговорно учество во современите економски текови.
