Петта Седница на Одборот за избор и следење на референтни банки

На 29.09.2021 година, во просториите на Македонската Банкарска Асоцијација (МБА) се одржа петтата Седница на Одборот за избор и следење на референтни банки. Со Седницата претседаваше Претседателот на Одборот за избор и следење на референтни банки г-дин Влатко Лескароски, во присуство на сите членови на Одборот.

На петтата Седница, членовите на Одборот согласно нивните ингеренции и Дневниот ред за оваа Седница дискутираа за поставувањето на котациите на референтните банки и движењето на SKIBOR каматните стапки во Q3 2021 година, при што беше даден преглед и образложение на SKIBOR каматните стапки и на котациите за SKIBOR каматните стапки во Q3 2021 година од сите референтни банки, при што се констатираше дека сите Банки согласно Правилата за котации постапуваат соодветно и максимално квалитетно одговараат на барањата и обврските.

Во продолжение на Седницата се разговараше и детално се разгледаа отворените прашања поврзани со процесот на пренос на системот за пресметка на SKIBOR каматните стапки од НБРСМ во МБА и се констатира дека процесот е во завршна фаза и се очекува во следните неколку месеци успешно да заврши.

Исто така, се разговараше и за актуелниот процес на замена на референтните LIBOR каматни стапки (процес кој е актуелен во светски рамки), при што се потврди дека Банките се соодветно ангажирани во решавањето на овој предизвик и во координација на МБА и во соработка со НБРСМ истиот успешно ќе заврши во предвидените временски рамки.

На крај се заклучи дека, благодарение на максималниот ангажман на сите чинители во банкарскиот систем, подготвено ќе бидат дочекани сите значајни промени кои следуваат во иднина во повеќе сегменти, со што системот ќе продолжи успешно да функционира во интерес на клиентите, банките и целокупниот систем во целина.