Комисијата за документарно работење дебатираше за гаранциското работење
Комисијата за документарно работење на 27.9.2023 година иницираше дебата за гаранциското работење. Поконкретно за трансфер на банкарска гаранција и упатување на плаќањето (асигнација) при наплата на инструментот.
За актуелностa на темите сведочи интересот меѓу членките на Комисијата за документарно работење, а на поканата се одзваа и колегите од Народната банка на Република Северна Македонија.
![](https://mba.mk/w/wp-content/uploads/2023/10/komisija-za-dokumentarno-rabotenje-sept2023-02.jpg)
За време на речиси две и пол часовната дискусија, практичарите за документарно работење и експертите од правниот дел кои беа претставници од некои банки, се согласија околу дефинирањето на преносот на гаранцијата (и дистинкцијата од асигнацијата), нејзината потреба и можните причини кои доведуваат до трансфер на обврските и побарувањата по оваа банкарска услуга.
Но, со оглед дека во меѓународните узанси и поврзаните брошури издадени од Меѓународната стопанска комора со седиште во Париз (International Chamber of Commerce ICC), нема конкретен опис како да се реализира преносот на гаранцијата, а имајќи го во предвид и не толку големиот број на случаи од скорешната домашна практика, останува на самите банки по сопствено видување да одлучат како ќе пристапат кон ефектуирање на инструкциите за пренос.
![](https://mba.mk/w/wp-content/uploads/2023/10/komisija-za-dokumentarno-rabotenje-sept2023-03.jpg)
Техниката за трансфер на банкарската гаранција може да биде предмет и на посебна анализа во рамките на МБА во наредниот период. Пожелно е да биде поддржана и со експертиза на специјалисти за гаранциско работење од странство, со цел да се пренесат детали од праксата и од други земји.