Европскиот квиз за пари е најголемиот европски натпревар кој има за цел да ја подобри финансиската писменост кај учениците од 13 до 15 години. Започнат во 2017 година како иницијатива за промовирање на финансиската едукација од страна на националните банкарски асоцијации во Европа и под координација на Европската банкарска федерација, Европскиот квиз за пари е една од многуте активности организирани во 30+ земји за време на Европската недела на пари, што се одржува во март секоја година.

Европската банкарска федерација и нејзините членови развиваат широки иницијативи за ангажирање на помладите и постарите граѓани ширум континентот за зајакнување на нивните финансиски вештини со уникатни едукативни проекти и материјали. Познавањето на личните финансии, економијата и ризикот е од клучно значење за управување со секојдневните трошоци, справување со предизвиците, избегнување измами и градење на иднината.

Финансиската едукација повторно ќе биде во фокусот на активностите низ Европа од 18 до 24 март 2024 година, кога националните банкарски асоцијации во повеќе од 30 земји ќе започнат активности како дел од Европската недела на парите, со цел да допрат до илјадници млади луѓе со поглед на подобрување на финансиската писменост и подигање на свеста за нејзината важност.

Европскиот банкарски сектор, на иницијатива на Европската банкарска федерација од Брисел, ќе го организира овој настан по десетти пат. Европската недела на пари има за цел да ја подигне јавната свест за придобивките од финансиската едукација.

Македонската банкарска асоцијација по шести пат го организира натпреварот “Европски квиз на пари”, најголемиот европски натпревар за финансиска едукација во организација на Европската банкарска федерација, чие финале ќе се одржи од 18-ти до 19-ти април 2024 година во Брисел, Белгија.

Националниот натпревар на кој ќе може да се пријават ученици од 13-15 години, ќе се организира за време на Европската недела на пари (18-ти до 24-ти март 2024 година). Националниот натпревар ќе биде двојазичен, на македонски и на албански јазик, додека на европското финале сите натпреварувачи ќе се натпреваруваат на својот мајчин јазик.

Натпреварот се реализира во соработка со Народна банка и Комисија за хартии од вредност, и е поддржан од Министерство за образование и Министерство за финансии на Република Северна Македонија.